काठमाडौं- सुनचाँदी व्यवसायीहरुले व्यवसायीक सुरक्षाका लागि व्यवसायीहरुबीच एकता हनपर्ने खाँचो औंल्याएका छन्। व्यवसायीबीच एकता हुन नसके त्यसको असर समग्र सुनचाँदी व्यवसायमा पर्ने भएकोले एकै प्रकृतिका संस्थाहरु आपसमा मिलेर अगाडि बढ्नु पर्ने उनीहरुको भनाइ छ। 

नेपाल सुनचाँदी व्यवसायी महासंघले नेपाल सुनचाँदी रत्न तथा आभुषण व्यवसायी महासंघका नवनिर्वाचित पदाधिकारीहरुको सम्मानमा सोमबार आयोजना गरेको कार्यक्रममा सहभागी व्यवसायीहरुले दुई महासंघबीच आपसीएकताको खाँचो औल्याएका हुन्। 

कार्यक्रममा नेपाल सुनचाँदी व्यवसायी महासंघका अध्यक्ष माणिक रत्न शाक्यले व्यवसायीहरु एकजुट भएर अगाडि बढ्न सके जस्तो सुकै अप्ठ्यारा र चुनौतिहरुलाई पनि सहजै चिर्न सकिने बताए। सुनचाँदी व्यवसायीले कच्चा पदार्थको अभावदेखि अन्य धेरै समस्या झेल्नु परेको उल्लेख गर्दै यसका समाधानका लागि नेपाल सुनचाँदी ब्यवसायी महासंघ र नेपाल सुनचाँदी रत्न तथा आभुषण व्यवसायी महासंघबीच कम्तिमा पनि साझा मुद्दामा एकता हुनुपर्ने उल्लेख गरे। 

त्यसक्रममा रत्न तथा आभुषण व्यवसायी महासंघका नवनिर्वाचित अध्यक्ष सुरेशमान शाक्यले सवै सुनचाँदी व्यवसायीका मुद्दा एउटै भएकोले सबै मिलेर अगाडि बढ्नुपर्ने खाँचो औल्याए। त्यसक्रममा महासंघका विशिष्ट सदस्य मणिरत्न शाक्यले दुई महासंघबीच कम्तिमा पनि कार्यगत एकता हुनुपर्ने बताए।