काठमाडौं- बैंकमा पैसा थुप्रिन थालेपछि सेयर बजार उकालाे यात्रामा लागेकाे छ। एक सातामै बैंकमा ५८ अर्ब निक्षेप बढेकाे छ। जसकाे असर सिधा सेयर बजार काराेबारमा परेकाे छ। जसका कारण सेयर बजार बढ्नुकाे साथै काराेबार रकमसमेत बढेकाे छ। 

गएको साताको पाँच र यो साता आइतबारसहित ६ दिनमा गरेर २४१.०४ अंकले बढेको सेयर बजारमा सोमबार पनि झिनो अंकले बढेको हो। सोमबार उतारचढाव देखिएको बजार १९.४३ अंकले बढेर २७८४.९५ बिन्दुमा पुगेको छ। सोमबार ७ अर्ब १२ करोड रूपैयाँको कारोबार भएको छ। 

पुष १६ गतेदेखि पुष २३ गतेसम्म निक्षेप ५८ अर्बले बढेर ४२ खर्ब ४९ अर्बबाट ४३ खर्ब ७ अर्ब पुगेको छ। त्यस्तै कर्जा लगानी पनि ९ अर्बले बढेर ४० खर्ब ९९ अर्बबाट ४१ खर्ब ०८ अर्ब पुगेको छ। बैंकहरूको सीडी रेसियो अनुपात पनि सुध्रिएर ८९ं.३९ मा झरेको छ।  

गएको साता १६७.९९ अंकको बढोत्तरी देखिएको सेयर बजारमा यो साता कारोबारको पहिलो दिन आइतबार ७३.०५ अंकले बढेको थियो। लगातारको बढोत्तरीले बजार अब ३२०० को बिन्दुमा पुग्ने संकेत देखिएको विश्लेषकहरूले बताइरहेका छन्। 

सेयर विश्लेषक विष्णु प्रसाद बस्याल अबको एक महिनामै बजार ३२ सय अंक माथि पुग्ने दाबी गर्छन्। ‘बजारको ट्रेन्ड हेर्दा अब सबै कुराले सपोर्ट गरेकोले एक महिनामै ३२०० माथि जाने देखिन्छ,’ बस्यालले भने। बजारमा केही करेक्सन आउँदै बढ्ने भएकोले अब बजार बुलको ट्रेन्डमा पुगेकोसमेत बस्याल बताउँछन्। बजार २२०० मै टेको लागेर अगाडि बढेकोले अब पछाडि नफर्कने दाबीसमेत उनको छ। 

गएको साता पनि चार दिन बढेको बजारमा एक दिन भने करेक्सन देखिएको थियो। गएको साता आइतबार र सोमबार दुई दिनमा ९२.४४ अंकको सुधार देखिएको बजार मंगलबार पनि ६३.०१ अंकले बढेको थियो। बुधबार भने ३०.७५ अंकले घटेर बजार २६४९.२० बिन्दुमा झरेको थियो। गएको साता बिहीबार ४३.२९ अंकले बढेर बजार २६९२.४७ बिन्दुमा पुगेको थियो।