काठमाडौं- एकदिनको करेक्सनपछि सेयर बजारमा पुन: वृद्धि देखिएको छ। व्यापक उतारचढावबीच मंगलबार सेयर बजारमा दोहोरो अंकको वृद्धि देखिएको हो। 

लगानीकर्ताहरू विश्वस्त देखिँदा यो साता पहिलो कारोबारमा आइतबार दुईपटक सकारात्मक 'सर्किट ब्रेक' लागेर ११३.०७ अंकले बढेको सेयर बजारमा सोमबार भने २०.६३ अंकले घट्दै करेक्सन देखिएको थियो। 

मंगलबार ३५.५५ अंकले बढेर बजार २६९६.६५ बिन्दुमा पुगेको छ। १८९ कम्पनीको सेयर मूल्य बढेको बजारमा १७ अर्ब २६ करोड ६३ लाख ९१ हजार रुपैयाँको कारोबार भएको छ। ४७ कम्पनीको सेयर मूल्य घटेको छ भने ६ कम्पनीको मूल्यमा परिवर्तन भएको छैन। 

चालु आर्थिक वर्ष २०८१/८२ का लागि नेपाल राष्ट्र बैंकले ल्याएको मौद्रिक नीतिका व्यवस्थाले पुँजीबजारमा सकारात्मक प्रभाव देखिएको छ। गएको शुक्रबार आएको मौद्रिक नीतिपछि संगठित लगानीकर्ताहरू थप उत्साहित देखिएका छन्। जसले आइतबारको बजारमा उछाल नै देखिएको थियो।  

२०७८ भदौ २ गतेको नेप्से हालसम्मकै उच्च बिन्दु ३१९९ मा पुगेको थियो। त्यसपछि लगातार घटेर १८ सयको बिन्दुमा आइपुगेको थियो। १८ सयदेखि २ हजारको बिन्दुमा लामो समय बजार घुमेर बस्दै अहिले उचाइतर्फ लागेको हो। अहिलेको वृद्धिमा लगानीकर्ताको मनोवैज्ञानिक अवस्थादेखि नीतिगत साथसम्म मिलेकाले अब नयाँ उचाइतर्फ लाग्ने विश्लेषकहरू बताउँछन्।