काठमाडौं- राजस्व अनुसन्धान विभागले ५ जना विरुद्ध २४ करोड ४१ लाख २२ हजार रुपैयाँ सजाया दाबी गर्दै कर छलीको मुद्दा दायर गरेको छ। 

नक्कली भ्याट बिल  प्रयोग गरेर कर छली गरेको आरोपमा आज उच्च अदालत पाटनमा मुद्दा दायर गरिएको विभागले जानकारी दिएको छ। 

यादब बिजनेश ट्रेड लिङ्क का प्रोपराइटर सोनालालप्रसाद यादबसहित पाँच जना विरुद्ध विभागले मुद्दा दायर गरेको हो। 

यादब बिजनेश ट्रेड लिङ्कले वस्तु तथा सेवा खरिद नै नगरी झुठ्ठा तथा नक्कली भ्याट विजक मात्र खरिद गरी मूल्य अभिवृद्धि कर र आयकर समेतको राजस्व चुहावट गरेको भन्दै विभागले मुद्दा दायर गरेको हो। 

विभागले जयकिशोर साह, परमेश्वर साह, मुकेशकुमार झा, सानुकुमार श्रेष्ठ र सोनालालप्रसाद यादब विरुद्ध १२ करोड २० लाख ६१ हजार विगो र त्यति नै जरिबानाको माग गर्दै मुद्दा दायर गरेको हो।