काठमाडौं- नेपाल स्टक एक्सचेन्ज लिमिटेडले तारागाउँ रिजेन्सी होटल कम्पनी लिमिटेडको सेयर सूचीकरण स्थगन गरिदिएको छ। 

सञ्चालक समितिले नियमविपरीत गतिविधि गर्दे सेयरको मूल्यमा प्रभाव पार्न खोजेको भन्दै नेप्सेले कम्पनीलाई स्पष्टीकरण सोध्दै कारोबार रोकिदिएको हो। 

कम्पनीको सञ्चालक समितिको बैठक शनिबार बसेर गत वर्षसम्मको नाफाबाट सेयरधनीलाई लभांश दिने निर्णय गरेको थियो। सो निर्णयको जानकारी आज सोमबारमात्र नेप्सेलाई उपलब्ध गराइएको थियो। यो काम नियम विपरीत भएको भन्दै नेप्सेले तीन दिनभित्र स्पष्टीकरण पेस गर्न कम्पनीलाई निर्देशन दिएको छ। 

कुनै पनि कम्पनीको सेयर मूल्य प्रभावित हुने निर्णय भएको दिन वा त्यसको भोलिपल्ट बजार खुल्नुभन्दा पहिले नै नेस्पेलाई जानकारी गराउनुपर्छ। तर तारागाउँले भने शनिबार निर्णय गरेर सोमबार बुझाएको छ। 

कम्पनीले गत आर्थिक वर्षको नाफाबाट चुक्ता पुँजीको ४ प्रतिशत सेयर लाभांश दिने भएको छ। त्यस्तै कर प्रायोजनसहित ११ प्रतिशत नगद लाभांश दिने निर्णय गरेको हो।