काठमाडौं- निरन्तर उतारचढावमा रहँदै लामो समयपछि बुधबार एकदिन उचालिएको सेयर बजार पुन: एकदिन बढेर फेरि ओरालोतिरै लागेको छ। साताको पहिलाे दिन आइतबार बजार स्थिर देखिएको छ।

आइतबार ‍‍‍२.८० अंकले घटेर बजार १९३१.६८ बिन्दुमा झरेको छ। ७० कम्पनीको मात्र सेयर मूल्य बढ्दा आइतबार ९७ करोड ४५ लाख रूपैयाँको कारोबार भएको छ। 

गएको साता निरन्तर आरालो लागेकाे सेयर बजार बुधबार ९२.२२ अंकले बढेको थियो। तर सेयर बजारको उछाल एकदिन पनि टिक्न सकेन। बिहीबार २९.०७ अंकले घटेर १९३४.४७ बिन्दुमा झर्‍यो। 

बैंकहरूले ब्याजदर घटाउने निर्णय गरेसँगै बजारमा व्यापक वृद्धि देखिएको आँकलन भइरहँदा अहिले पुन: बजारमा उतारचढावकै अवस्था देखिएको हो। लगानीकर्तालाई विश्वास दिलाउने प्रयासमा अर्थमन्त्री प्रकाशशरण महत लागिरहँदा बजारमा स्थायी सुधारको आधार देखिएको छैन।

केही ठूला लगानीकर्ताको वरपर देखिने गरेको बजारमा पुन: उतारचढावले उही बिन्दुवरपर तलमाथि भइरहेको देखिन्छ।