काठमाडौं- सिभिल बैंकको सेयर कारोबार रोक्का हुने भएको छ। 

नेपाल धितोपत्र बोर्डले जारी गरेको मर्जरसम्बन्धी निर्देशिका बमोजिम नेपाल स्टक एक्सचेन्ज (नेप्से) ले हिमालयन बैंकसँग गाभिएको सिभिलको सेयर कारोबार फागुन १२ गतेदेखि रोक्का गर्ने निर्णय गरेको हो। 

सिभिललाई हिमालयनले प्राप्ति गरी भोलिदेखि एकीकृत कारोबार सुरु गर्दैछ। अब सेयर मिलानलगायतका प्रक्रिया पूरा भएपछि सिभिलको सेयर हिमालयनको नाममा सूचीकृत भई कारोबारमा आउनेछ। 

नेपाल राष्ट्र बैंकले दुवै बैंकलाई गत माघ १७ गते मर्जरका लागि अन्तिम स्वीकृति दिएको थियो। केन्द्रीय बैंकले अन्तिम स्वीकृत दिँदै फागुन १६ गतेसम्म एकीकृत कारोबारको समय तोकेको थियो। राष्ट्र बैंकले तोकेको समयभन्दा अगाडि नै बैंकले एकीकृत कारोबारको मिति तोकेको हो।