काठमाडौं- कृषि विकास बैंकको प्रमुख कार्यकारी अधिकृत (सीईओ) मा गोविन्द गुरुङ नियुक्त भएका छन्। सञ्चालक समितिको बैठकले गुरुङलाई सीईओमा नियुक्त गरेको हो।

सीईओ छनोट समितिले  तीनजनाको नाम बोर्डमा सिफारिस गरेको थियो। तीनजनामध्येबाट बोर्डले गुरुङलाई सीईओ बनाउने निर्णय गरेको हो। 

उनी सिभिल बैंकका पूर्व सीईओ हुन्। नवनियुक्त सीईओ गुरुङसँग बैंकिङ क्षेत्रमा करिब २६ वर्ष काम गरेको अनुभव छ।

त्रिभुवन विश्वविद्यालय अन्तर्गत रहेको नेपाल कमर्स क्याम्पसबाट प्रथम श्रेणीमा एमबीए उत्तीर्ण गरेका गुरुङले हिमालयन बैंकबाट आफ्नो बैंकिङ करियर सुरु गरेका थिए। त्यसपछि उनी सिभिल बैंक प्रवेश गरेर साढे ४ वर्ष डेपुटी सीईओ भएका थिए।