काठमाडौं- नयाँ सरकार आएयता निरन्तर उकालोमा देखिएको सेयर बजारमा गत सातादेखि उतारचढाव आइरहेको छ। गएको साता उतारचढावबीच समग्रमा ५.३३ अंकको वृद्धि भएको बजारमा यो साता उही अवस्था दोहोरिने देखिएको छ। 

यो साताको पहिलो कारोबारमा मंगलबार ३२.७२ अंकको वृद्धि देखिएको बजार बुधबार ओरालो लागेको छ।

बुधबार ९.०१ अंकले घटेर बजार २१७३.१० बिन्दुमा झरेको छ। ४ अर्ब ९२ करोड ८७ लाख रुपैयाँको कारोबार भएको बजारमा ८० कम्पनीको सेयर मूल्य बढेको छ। १२१ कम्पनीको मूल्यमा गिरावट आउँदा ६ कम्पनीको मूल्यमा परिवर्तन भएको छैन। 

अहिलेको अवस्थामा अब सरकारले लिने नीतिपछि मात्रै विश्वासयोग्य सुधारको अपेक्षा गर्न सकिने विश्लेषकहरूको भनाइ छ। केही ठूला लगानीकर्ताको चलखेल हो या बजारले नयाँ गति समात्ने बाटो देखाएको हो भन्ने यकिन आधार देखिँदैन।  

नयाँ सरकार गठन भएसँगै विश्वासको वातावरण देखिएको भनिएको सेयर बजारमा सुधारका बीच उतारचढाव भइरहेको देखिन्छ। बजारमा अहिले पनि विश्वासयोग्य वातावरण बनेको हो या उतारचढावमै रहेको हो भन्ने यकिन नदेखिएको विश्लेषकहरू बताउँछन्।