काठमाडौं- विभिन्न खण्ड निर्माणको जिम्मा लिएर सम्झौता अनुसारको काम नगर्ने चार निर्माण व्यवसायीलाई हुलाकी राजमार्ग निर्देशनालयले तीन दिने स्पष्टीकरण सोधेको छ। 

आयोजना अन्तर्गत चीतवनको ठोरी-माडी सडक चितवन अन्तर्गतको घाँघर खोला पुल निर्माणको जिम्मा लिएर संसोधित समयमा पनि काम नगरेको सपना/लोहनी जेभी काठमाडौंलाई ३ दिने स्पष्टटीकरण सोधिएको छ। सोही सडक खण्डको पतरी खोला पुल निर्माणको जिम्मा लिएको लोहनी एण्ड ब्रदर्श चितवनलाई पनि स्पष्टीकरण सोधिएको छ। 

बाराको मनमात-कलैया-मत्रैया सडकको स्तरोन्नतिको जिम्मा लिएको सप्तकवशी जलाधार-ओमसाई एण्ड कम्पनी जेभी काठमाडौं, बारा पर्सा अन्तर्गत हुलाकी राजमार्गका पुलको मर्मत गर्ने जिम्मा पाएको आरएनसी कन्स्ट्रक्सन बारालाई पनि स्पष्टीकरण सोधिएको छ। 

सुरुवाति सम्झौता गुज्रिएर थपिएको समयमा पनि काम नगरेका यी कम्पनीले तीन दिनभित्र चित्तबुझ्दो जवाफ नदिएमा सम्झौता रद्ध गरी कालोसूचीमा राख्ने प्रक्रिया अघि बढ्नेछ।