काठमाडौं- सरकारले पोखरामा निर्माण भएको पोखरा अन्तर्राष्ट्रिय विमानस्थलमा भन्सार कार्यालय स्थापना गर्ने निर्णय गरेको छ। बिहीबार बसेको मन्त्रिपरिषदको बैठकको निर्णय सार्वजनिक गर्दै शुक्रबार अर्थमन्त्री विष्णु पौडेलले पोखरा अन्तर्राष्ट्रिय विमानस्थलमा भन्सार कार्यालय स्थापना गरिने जानकारी दिए। 

अर्थ मन्त्रालयको प्रस्तावमा पोखरामा भन्सार कार्यालय स्थापना गर्ने र आवश्यक जनशक्ति व्यवस्थापनको लागि संगठन तथा ब्यवस्थापन सर्वे गर्ने निर्णय भएको छ।

मन्त्रिपरिषद बैठकले राष्ट्रिय सभा सदस्य खिमलाल भट्टराईको राजीनामापछि उनको स्थानमा निर्वाचन गर्ने निर्णय गरेको छ। उक्त निर्वाचन २०७९ माघ २५ गते हुनेछ।

यस्तै कम्बोडियामा आगलागीमा परेका निराकर पाण्डेलाई नेपाल ल्याउन आर्थिक सहयोग गर्ने निर्णय पनि भएको मन्त्री पौडेलले बताए।

२०७९ निर्वाचनका समयमा ज्यान गुमाएका सन्दीप ऐरी र चेतन ऐरीको परिवारलाई १० लाखको दरमा सहयोग गर्ने निर्णय पनि मन्त्रिपरिषद्‍ले गरेको छ।