काठमाडौं- जिल्ला प्रशासन कार्यालय काठमाडौंले आफूहरूले दिने विभिन्न १० वटा सेवामा ‘टाइम कार्ड’ लागु गरेको छ। काठमाडौंका प्रमुख जिल्ला अधिकारी घनश्याम उपाध्यायले बिहीबारबाट दैनिक प्रवाह हुने १० वटा सेवामा निश्चित समय तोकेर सेवा दिने व्यवस्था मिलाएका हुन् ।

जसमा एकघण्टामा नागरिकता दिनेदेखि आधिघण्टामा राष्ट्रिय परिचयपत्र दिनेसम्मको तयारी गरिएको बताइएको छ। अबदेखि तोकिएका कागजात पूरा गरेर आएका सेवाग्राहीले तोकिएको समयभित्र नै सेवा लिन पाउनेछन्।

यस्तै संस्था नवीकरण ३० मिनेटभित्र, नेपाली नागरिकता प्रमाणपत्र र नाबालक परिचयपत्र १ घण्टाभित्र, राष्ट्रिय परिचयपत्र कार्ड वितरण ३० मिनेट, राहदानी वितरण १५ मिनेटभित्र, जिल्ला प्रशासनबाट हुने सिफारिसपत्र १ घण्टा, मुद्दाको पेशी र तारेख ३० मिनेट र मुद्दाको फैसला ६० दिन भित्र हुने गरी सेवा प्रवाहमा टाइम कार्ड लगाइएको छ।

त्यस्तै शुक्रबारबाहेक कार्यालय खुल्ने समय ५ दिन दिउँसो ३ बजेदेखि ४ बजेसम्म प्रजिअले गुनासो सुन्ने व्यवस्था पनि मिलाइएको छ। प्रशासनले ६५ वर्ष उमेर नाघेका, अशक्त, बच्चा बोकेका महिलालाई लाइनमा नबसी सेवा पाउने प्रबन्ध पनि सुरु गरेको छ।

त्यस्तै ७५ वर्षमाथिका वृद्धवृद्धालाई प्रशासनले सहयोगी नै खटाएर सेवा प्रदान गर्ने व्यवस्था पनि सुरु गरेको जनाएको छ।

कुन काम कति समयमा?