काठमाडौं- मन्दिर निर्माणमा भ्रष्टाचार गरेको भन्दै अख्तियार दुरुपयोग अनुसन्धान आयोगले मुद्दा दायर गरेको छ। 

सर्लाहीको कविलासी नगरपालिका- ८ मा रहेको अधुरो रामजानकी मन्दिर निर्माणमा अधिक रकम भुक्तानी गरेको पाइएकाले नगरका कर्मचारीसहित उपभोक्ता समितिका पदाधिकारीविरुद्ध  विशेष अदालतमा मुद्दा दायर गरेको छ। 

मन्दिर निर्माणको काममा वास्तविक कार्यभन्दा बढी कार्य भएको गलत विल बनाई रकम हिनामिना गरेको भन्ने उजुरी निवेदन सम्बन्धमा अनुसन्धानबाट ९७ हजार ८४० रुपैयाँ बढी भुक्तानी लिने दिने काम भएको पाइएको विभागले उल्लेख गरेको छ। 

अख्तियारले तत्काली नगरका प्रमुख प्रशासकीय प्रमुख श्याम किशोर राय, इन्जिनियर रामविनय प्रसाद यादव, सव इन्जिनियर उमेशकुमार दासविरुद्ध मुद्दा दायर गरेको छ।

त्यस्तै मन्दिर निर्माण उपभोक्ता समितिका अध्यक्ष रामभरोसी मण्डल, सचिव बालमेश्वर साह, कोषाध्यक्ष रिना कुमारीविरुद्ध अख्तियारले कैद तथा जरिवानाको माग गर्दै मुद्दा दायर गरेको छ।