काठमाडौं- गत वर्षको तुलनामा गएको कात्तिक महिनामा उपभोक्ता मूल्यवृद्धि ८.०८ प्रतिशतले कायम भएको छ। 

नेपाल राष्ट्र बैंकका अनुसार कात्तिकमा ८.०८ प्रतिशत मूल्यवृद्धि कायम भएको हो। 

वार्षिक बिन्दुगत आधारमा भदौमा मूल्यवृद्धि उच्च बिन्दु अर्थात् ८.६४ प्रतिशत पुगेको थियो। असोजमा केही मत्थर भएर  ८.५० प्रतिशतमा सीमित भएको थियो भने कात्तिकमा अझै घटेको छ। 

अघिल्लो वर्षको कात्तिको महिनामा मूल्यवृद्धि ६.०४ प्रतिशत थयो। कात्तिकमा खाद्य तथा पेय पदार्थ समूहको मुद्रास्फीति ७.३८ प्रतिशत र गैर-खाद्य तथा सेवा समूहको मुद्रास्फीति ८.६३ प्रतिशत रहेको छ। 

सबैभन्दा धेरै मूल्यवृद्धि हुने समूहमा  खाद्य तथा पेय पदार्थ १५.९७ प्रतिशत, सुर्तीजन्य पदार्थको ११.८१ प्रतिशत, दुग्ध पदार्थ तथा अण्डाको ९.३३ प्रतिशत, खाद्य तथा खाद्यजन्य पदार्थको ९.१९ प्रतिशत र मदिराजन्य पेय पदाथको ८.८४ प्रतिशत रहेको छ। 

सेवा समूह अन्तर्गत यातायातको १७.७१ प्रतिशत, स्वास्थ्य सेवाको ११.२२ प्रतिशत मूल्यवृद्धि मापन भएको छ। 

सबैभन्दा धेरै मूल्यवृद्धि हुने ठाउँमा काठमाडौं उपत्यका रहेको छ।