काठमाडौं- नेकपा एमालेका अध्यक्ष तथा पूर्वप्रधानमन्त्री केपी शर्मा ओली मध्यराति ठमेलस्थित एलओडी नाइटक्लब पुगेका छन्।

आगामी मंसिर ४ गते हुने प्रतिनिधि सभा र प्रदेश सभा निर्वाचनका लागि चुनावी अभियानमा व्यस्त रहेका ओली शुक्रबार राती १२ बजे एलओडी ठमेलको (लर्ड अफ ड्रिंक्स) क्लबमा पुगेका थिए।  

एलओडी पुगेर ओलीले आफ्नो नाममा बनेको र्‍याप गीत 'सहर सहरमा ओली' समेत सार्वजनिक गरेका हुन्। केपी ओलीका बारेमा बनाइएको र्‍याप गीत युट्युबमा भने एक हप्ताअघि नै सार्वजनिक गरिएको थियो।

शुक्रबार नै 'केपी बा' नाम दिइएको अर्को र्‍याप गीत पनि सार्वजनिक भएको थियो। युवाहरूमाझ लोकप्रिय रहेको र्‍याप गीत सार्वजनिक गर्न आफू एल‌ओडी पुगेको अध्यक्ष ओलीले सामाजिक सञ्जालमार्फत उल्लेख गरेका छन्।