काठमाडौं- जलवायु परिवर्तनका कारणले न्यून तथा मध्यम आय भएका मुलुममा पर्ने खराब प्रभाव न्यूनीकरणका लागि धनी तथा उच्च आय भएका मुलुकले सहायता गर्नुपर्ने विश्व बैंकको पछिल्लो अध्ययनले सिफारिस गरेको छ। 

विश्व बैंकले हालै गरेको २० वटा देशको क्लाइमेट एण्ड डेभलपमेन्ट : एजेन्डा फर एक्सन अध्ययन प्रतिवेदनले पहिलो कुरा त उच्च आय भएका मुलुकले तीव्र कार्बन उत्सर्जन घटाउनुपर्ने र त्यसपछि गरिब मुलुकलाई सहयोग पनि गर्नुपर्ने औल्याएको छ। 

न्यून तथा मध्यम आय भएका मुलुकमा जलवायु अनुकूलन तथा न्यूनीकरणका लागि  संस्थागत क्षमतामा वृद्धि, पूर्वाधारमा लगानी बढाउनुपर्ने अत्यन्त आवश्यक रहेको छ। नीतिगत रुपान्तरणका लागि धनाढ्य मुलुकले अनुदान उपलब्ध गराउनुपर्ने सिफारिस प्रतिवेदनले गरेको छ। 

कूल कार्वजन उत्सर्जनमा ३४ प्रतिशत भूमिका खेल्ने २० मुलुकको छुटाछुटै अध्ययन गरेको विश्व बैंकले सन् २०५० सम्म ७० प्रतिशतले उत्सर्जन घटाउनका लागि वर्षेनी कूल गार्हस्थ उत्पादनको १.४ प्रतिशत लगानी गर्नुपर्ने देखिएको छ। 

जलवायु परिवर्तनको जोखिम हेरि देश अनुसार वार्षिक लगानी फरक हुने प्रक्षेपन गरिएको छ। कतिपय देशमा ८ प्रतिशतसम्मको लगानी आवश्यक देखिन्छ। यसरी लगानी गरेपछि मात्र सन् २०५० सम्म ७० प्रतिशत कार्बन उत्सर्जन घटाउने लक्ष्य पूरा हुने विश्व बैंकले अनुमान गरेको छ। 

एक आपसमा सहकार्य तथा वैश्विक साझेदारी नहुँदासम्म  कुनै पनि लक्ष्य पूरा नहुने उल्टो यसको असर अर्थतन्त्र तथा जनजिविकामा पर्ने छ। जलवायु परिवर्तनकै कारण हुने घटनाले गर्दा गरिबीको दर बढ्ने र लाखौं मान्छे गरिब हुनसक्ने छन्।