.gif)
.gif)
.gif)
.gif)
.gif)
काठमाडौं- सरकारले विभिन्न चारणमा गरेर सबै प्रकारका सार्वजनिक सवारीको दर्ता खुला गरेको छ। तेस्रो चरणामा असोज १ गतेदेखि लागु हुनेगरी केही सर्तसहित यात्रुबाहक सार्वजनिक सवारीसाधनको दर्ता खुलाएको हो।
यातायात व्यवस्था विभागले सर्तसहित असोज १ गतेदेखि लागु हुने गरी यात्रुबाहक सार्वजनिक सवारीको दर्ता खुलाएको मंगलबार जारी विज्ञप्तिमार्फत जनाएको छ।
विभागले सातै प्रदेशका यातायात मन्त्रालय र सबै स्थानीय तहहरूलाई परिपत्र गर्दै सार्वजनिक सवारीको दर्ता खुलाएको जानकारी गराएको हो।
विभागका अनुसार उपत्यकाबाहिर विद्युतीय र आईसीई (डिजेल) दुबै सवारी दर्ता खुला गरिएको छ तर विद्युतीय सवारीलाई प्राथमिकता दिन विभागले भनेको छ।
त्यस्तै काठमाडौं उपत्यकाभित्र भने सबै खाले नयाँ सार्वजनिक सवारीसाधनको दर्ता खुला गरिएको छैन। उपत्यकाभित्र हाललाई स्कुल बस र सट्टाभर्ना हुने सवारीमात्र दर्ता हुने व्यवस्था विभागले गरेको छ।
उपत्यकाभित्रको रुट तथा सवारी व्यवस्थापनको लागि हाललाई सार्वजनिक सवारी दर्तामा लगाइएको रोक कायमै राखिएको विभागको भनाइ छ।
विभागले गएको जेठ ७ गते सार्वजनिक हित एवं सार्वजनिक सवारीको वैज्ञानिक व्यवस्थापन गर्ने भन्दै देशभर सार्वजनिक सवारीको दर्ता रोकेको थियो। विभागले सार्वजनिक यातायातको वैज्ञानिक व्यवस्थापन हुन नसकेका कारण अत्याधिक वायू प्रदूषण, सवारीको चाप र ट्राफिक जाम बढ्न गइ आवागमनमा कठिनाइ उत्पन्न भएको भन्दै दर्ता रोक्न निर्देशन दिएको थियो।
यसअघि विभागले दुई चरणमा सवारीको दर्ता खुलाएको थियो। पहिलो चरणमा असार ८ गतेसम्म एलसी खोलेर प्रक्रिया अघि बढिसकेका र नेपाल भित्रिसकेका सार्वजनिक सवारीको दर्ता खुलाएको थियो। त्यस्तै विभागले साउन १८ गते मालबाहक सवारीसाधनको दर्ता खुलाएको थियो।
