धोबिखोला करिडोरमा अनधिकृत भन्दै भत्काइयो सात तले घर

बिजनेस न्युज

आइतबार, वैशाख २० २०८३

धोबिखोला करिडोरमा अनधिकृत भन्दै भत्काइयो सात तले घर

अहिलेसम्म थापाथली, गैरीगाउँ, मनोहरा, शान्तिनगर, बालाजु, बसुन्धारा, बल्खु, सिनामंगल, कालीमाटी, धोबिखोला, टेकु, कपनलगायतका क्षेत्रमा पनि अनधिकृत भनिएका संरचना हटाइएको छ।

काठमाडौं- काठमाडौं महानगरपालिकाले मापदण्डविपरीत बनाइएको भन्दै धोबिखोला देवीनगरस्थित सात तले घरमा डोजर लगाएको छ। नगर क्षेत्रभित्रका अनधिकृत संरचना हटाउने क्रममा महानगरले आज आइतबार उक्त घरमा डोजर लगाएको हो।

महानगरले नगर क्षेत्रभित्रका अनधिकृत संरचना हटाउने क्रममा धोबिखोलामा नदी किनारमा नदी र सडक मापदण्ड मिचेर निर्माण गरेका संरचनामा डोजर लगाउन सुरु गरेको थियो। सोही क्रममा देवीनगरमा रहेका सात तल्ले पक्की घरमा डोजर लगाइएको हो।

यसअघि महानगरले शंखमुलस्थित नदी किनार र फुटपाथ मिचेर बनाइएका भौतिक संरचनाहरू हटाएको थियो। महानगरले यसअघि नै सार्वजनिक सूचना जारी गर्दै त्यस्ता अवैध संरचनाहरू स्वतःस्फूर्त रूपमा हटाउन सम्बन्धित पक्षलाई समयसीमा उपलब्ध गराएको थियो।