काठमाडौं- पछिल्लो १० महिनामा औसतमा दैनिक २७ वटा विपद्का घटना घटेका छन्। ती घटनामा मृत्यु भएका ५८९ जनाको शव व्यवस्थापन गरिएको नेपाल प्रहरीका केन्द्रीय प्रवक्ता, प्रहरी वरिष्ठ उपरीक्षक रमेश थापाले जानकारी दिए।

उनका अनुसार गएको मनसुनमा धेरै विपद्जन्य घटना घटेको र मानवीय क्षतिसमेत भएको थियो। प्रवक्ता थापाले १० महिनामा विपद्का आठ हजार २८३ घटना घटेको बताए। ती घटनाहरुमा परेर एक हजार ५१८ घाइते भएका छन्।

कूल ३२ परिवार विस्थापित भएको उनकाे भनाइ छ। ती विपद्जन्य घटनाहरुमा ५३ हजार प्रहरी जनशक्ति परिचालन गरी खोजतलास, उद्धार, राहत तथा सुरक्षित स्थानान्तरण गरिएको प्रहरीले जनाएको छ।

मनसुन प्रवेशको सँघारमा रहेकाले विपद् प्रतिकार्यका लागि प्रहरीले योजना निर्माण गरी आवश्यक तयारी गरिरहेको प्रवक्ता थापाले बताएका छन्। केन्द्रमा विपद् व्यवस्थापन कार्यालय रहेको र सबै प्रदेशमा विपद् व्यवस्थापन गुल्ममार्फत टोली परिचालन हुने जनाइएको छ।

जिल्लामा आवश्यकताका आधारमा विपद् व्यवस्थापन टोली परिचालन हुने प्रहरीले जनाएको छ। जल तथा मौसम विज्ञान विभागले यसवर्षको मनसुनमा सरदर भन्दा बढी वर्षा हुने आँकलन सार्वजनिक गरिसकेकाे छ। साेही कारण प्रभावकारी विपद् व्यवस्थापन अघि बढाउन आवश्यक तयारी भइरहेको प्रहरी प्रधान कार्यालयले जानाएकाे छ। रासस