धनकुटा- कर्णाली प्रदेशका मुख्यमन्त्री यामलाल कँडेलले कर्णालीको पर्यटन क्षेत्रमा लगानीका गर्न आग्रह गरेका छन्। शुक्रबार भेडेटारस्थित स्काइ वाक अवलोकनपछि उनले निर्माण कम्पनी वन्डर्स एम्युजमेन्ट पाक्रस एण्ड अट्रयाक्सन्स प्रालिलाई कर्णाली प्रदेशमा पनि साहसिक पर्यटनको ठूलो सम्भावना भएको उल्लेख गर्दै लगानी गर्न आग्रह गरेका हुन्।

‘आज यहाँको स्काइ वाकमा अवलोकन गर्न पाउँदा निकै खुसी लागेको छ, म चाहन्छु, निर्माण कम्पनीले कर्णाली प्रदेशको पर्यटन विकासका लागि लगानी गराेस्, यसका लागि प्रदेश सरकार सहजीकरणका लागि तयार छ’ उनले भने। साथै स्काइ वाकमा हिँड्दा डरसँगै खुसीको अनुभव भएको प्रतिक्रिया मुख्यमन्त्री कँडेलले दिए।

धनकुटाको साँगुरीगढी गाउँपालिका-४ र धरान उपमहानगरपालिका-६ को संगमस्थल भेडेटारस्थित चाल्स प्वाइन्टमा २० करोड लगानिमा स्काइ वाक निर्माण गरिएको हो। स्काइ वाक निर्माणपछि यहाँको पर्यटकीय गतिविधि बढेको स्काइ वाक भेडेटारका निर्देशन सुनिल भुसालले बताए।

स्काइ वाकबाट भेडेटार बजार, धरानदेखि इटहरीसम्मको मनोरम दृश्य तथा चारकोसे झाडी, सानोपाथीभरा मन्दिर साँगुरीगढीलगायतको दृश्यावलोकन गर्न सकिन्छ। स्काइ वाकको अनुभव लिनका लागि प्रतिव्यक्ति ५०० शुल्क तोकिएको छ। स्काइ वाकमा ३३ मिमि सिसाको प्रयोग गरिएको छ।

परियोजनामार्फत प्रत्यक्ष र अप्रत्यक्ष रुपमा करिब १०० जनाले रोजगारी पाएका छन्। यहाँ स्वदेशीसँगै भारतीय र बंगलादेशी पर्यटक आउने गरेका छन्। त्यसअवसरमा नेकपा (एमाले) प्रचार विभाग प्रमुख राजेन्द्र गौतम, एमाले नेता विशाल भट्टराई, यज्ञराज सुनुवार, कोसी प्रदेशसभा सदस्य निरन राईलगायतको उपस्थिति थियो। रासस