काठमाडौं- नेपाली कांग्रेसका प्रवक्ता डा.प्रकाशशरण महतले नेपाल राष्ट्र बैंकको गभर्नर नियुक्तिमा ढिलाइ गर्न नहुने बताएका छन्। बीपी चिन्तन प्रतिष्ठान र संसदीय अध्ययनन तथा विकास संस्थापनले बिहीबार आयोजना गरेको ‘आगामी बजेटका प्राथमिकताहरु’ विषयक विशेष अन्तरसंवाद कार्यक्रममा पूर्वअर्थमन्त्रीसमेत रहेका डा. महतले राजनीतिक पूर्वाग्रह नराखी योग्य र व्यावसायिक व्यक्तिलाई गभर्नर नियुक्त गर्नुपर्ने बताएका हुन्।

‘गभर्नर नियुक्तिमा ढिलाइ हुनु दुर्भाग्यपूर्ण कुरा हो’, प्रवक्ता डा. महतले भने, ‘जसले निरपेक्ष भावले अर्थतन्त्रलाई केन्द्रमा राखेर काम गर्छ त्यस्तो व्यक्तिलाई गभर्नर नियुक्त गर्नुपर्छ।’

साथै आगामी आर्थिक वर्षको बजेट सन्तुलित र अनुशासित हुनुपर्नेमा उनको जोड छ। बजेट भनेको वर्षभरिको आम्दानी र खर्चको विवरण भएकाले आम्दानी खर्च जुटाउने, स्रोतको सुनिश्चितता हुने र देशको आवश्यकता तथा प्राथमिकताका आधारमा बजेट विनियोजन गर्नुपर्ने बताएका छन्। त्यस्तै मौद्रिक नीति र वित्त नीतिलाई लयमा लैजानुपर्ने उनको भनाइ छ।

प्रवक्ता डा. महतले प्रशासनिक खर्च घटाएर पुँजीगत खर्च बढाउने गरी बजेट व्यवस्थापन हुनुपर्ने सुझाव दिएका छन्। देखाउनकै लागि ठूलो बजेट ल्याइने गरेको दृष्टान्त प्रस्तुत गर्दै उनले भने, ‘आम्दानी स्रोतको सुनिश्चितता हुनुपर्छ, पुँजीगत खर्च बढाउनुपर्छ, त्यसैले बजेट लोकप्रय हैन अनुशासित आवश्यक छ।’ सामाजिक सुरक्षा, शिक्षा, पर्यटन, सूचना प्रविधि, उत्पादनमूलक क्षेत्र आदिलाई बजेटले प्राथमिकता दिनुपर्ने उनको भनाइ छ।

नेपाली कांग्रेसका अर्का नेता दीपकुमार उपाध्यायले मुलुकको विद्यमान आर्थिक अवस्थालाई सुधार्ने गरी आगामी बजेटले प्राथमिकता दिनुपर्नेमा जोड दिएका छन्। देशको आर्थिक अवस्था लचिलो भएको, आम्दानीभन्दा खर्च बढी भइ ऋणले खर्च धान्नुपरेको अवस्थालाई सुधार्न बजेटले ध्यान दिनुपर्ने नेता उपाध्याय बताउँछन्।

त्यस्तै राष्ट्रिय योजना आयोगका पूर्वउपाध्यक्ष प्रा.डा. गोविन्दराज पोखरेलले प्रतिफल दिने क्षेत्र र मुख्य पूर्वाधार सम्पन्न हुनेगरी बजेट विनियोजन गर्न सुझाव दिएका छन्। ‘क्षमता विकासमा लगानी गरिनुपर्छ, ठूला जलासययुक्त आयोजनामा लगानी बढाउनुपर्छ’ पूर्वसदस्य पनेखरेलले भने, ‘निजी क्षेत्रमैत्री लगानीको वातावरण सिर्जना गर्दै आयात प्रतिस्थापन, फजुल खर्च रोक्नेजस्ता विषयलाई बजेटले प्राथमिकता दिनुपर्छ।’

राष्ट्रिय योजना आयोगका पूर्वउपाध्यक्ष डा. पुष्पराज कँडेलले अर्थतन्त्रलाई सही मार्ग दिन नीतिगत र संरचनागत सुधार जरुरी भएको औँल्याएका छन्।  राष्ट्र बैंकका पूर्वगभर्नर दीपेन्द्रबहादुर क्षेत्रीले बजेट परम्परागत हुने गरेको उल्लेख गर्दै आर्थिक क्षेत्रलाई चलायमान हुनेगरी प्राथमिकता प्राप्त आयोजना समेटिनुपर्नेमा जोड दिए। उनले बजेट स्रोतको सुनिश्चितता हुनेगरी सन्तुलित र पूर्वाधारमा लगानीयोग्य हुुनुपर्ने सुझाव दिए।

स्वास्थ्य बीमा बोर्डका कार्यकारी निर्देशक डा.रघुराज काफ्लेले विकासको सूचकलाई सम्बोधन हुनेगरी बजेट ल्याइनुपर्ने धारणा राखेका छन्। साथै सामाजिक सुरक्षाको सुनिश्चितता तथा पुँजीगत खर्च गर्ने क्षमता बढाएर निजी क्षेत्रलाई प्रोत्साहित गर्नेगरी खर्च गर्ने क्षमता बढाउनुपर्ने सुझाव निर्देशक काफ्लेको छ।

प्रतिष्ठानका अध्यक्ष हरिबोल भट्टराईले राजनीतिक नेतृत्वमा आध्यात्मज्ञान र नैतिकताकाे खाँचाे भएको औँल्याए। संसदीय अध्ययन तथा विकास संस्थापन समितिका महासचिव रुद्र शर्माले बजेट यथार्थ र तथ्यपरक ढंगले ल्याइनुपर्ने धारणा राखेका छन्। रासस