महोत्तरी- महोत्तरीका ग्रामीण क्षेत्रमा खाना पकाउने इन्धनका लागि ‘गुइँठा’ को जोहो सुरु भएको छ। जिल्लाका बजार र सहरी क्षेत्रमा खाना पकाउन ग्यास चुल्होको प्रयोग बढ्दै गए पनि ग्रामीण भेगमा अझै गुइँठा कै भर पर्ने गृहिणीहरु बर्खायामका लागि भन्दै यसको जोहो गर्न लागेका हुन्। 

बर्खाको समय सुरु हुन केही महिना बाँकी छ तर यहाँ भने अहिलेदेखि नै गुइँठाको व्यवस्थापन गर्ने गरिन्छ। हिउँदभरि सडक किनार र चरन क्षेत्रका चउर चाहर्दै गोबर संकलन गर्नु यहाँका ग्रामीण महिलाको नियमित तालिका नै हो।

गाईवस्तु पाल्नेले आफ्नै गोठको र नपाल्नेले चरन क्षेत्रबाट बटुलेर ल्याएको गोबरबाट खाना पकाउने दाउरा प्रयोजनका लागि गुइँठा बनाउँछन्। हिउँदमा बनाइएका गुइँठा बैशाख लागेपछि बर्खाकालका लागि सुरक्षित साथ राख्ने यहाँको चलन हो। हिउँदमा गोबर पथारेर विभिन्न आकारका गुइँठा बनाइन्छन्। यसबाट ‘चिपरी’ र ‘गोरहा’ बनाइन्छन्।

घरका भित्तामा पथारेर सुकाइएर बनाइएका गोबरलाई ‘चिपरी’ भनिन्छन्। यसैगरी, गोबर पथारेर त्यसभित्र स-साना झिक्रा वा पराल राखी डोल्याएर सुकाइने ‘गोरहा’ र यी दुवैलाई गुइँठा भनिन्छ। जिल्लामा १० नगरपालिका र ५ गाउँपालिकासहित १५ स्थानीय तह छन्। नगर क्षेत्रका भित्री बस्तीमा पनि गुइँठा को प्रयोग हुँदै आएको छ। बर्खाकालमा खेतबारीका झिक्राझिक्री भिजेर नबल्ने हुँदा गृहिणी त्यस समयका लागि अहिलेदेखि नै गुइँठा बनाएर राख्छन्।

‘खाना त पकाउनै पर्छ, बर्खामा दाउरा कहाँ खोज्नु? त्यसैले अहिले नै यिनलाई जोगाएर राख्नु परेको हो’, भंगाहा नगरपालिका-४ रामनगरकी पानवती दनुवार भन्छिन् ‘अहिले जोगाइएन भने झमझम पानी परेका बेला दुःख पाइन्छ।’ गुइँठा बनाउन पैसा खर्च गर्नु नपर्ने र एकपटक सल्काएपछि आगो ननिभ्ने हुँदा खाना पकाउने प्रयोजनका लागि गृहिणीको रोजाइमा पर्छ। अझ गरिब बस्तीमा ग्यासचुल्हा र काठका दाउराको जोहो गर्न नसक्ने हुँदा गुइँठा अनिवार्यजस्तै छ।

त्यसैले यी बस्तीका गृहिणी कात्तिकदेखि चैतसम्म गोबर संकलन गरेर ‘चिपरी’ र ‘गोरहा’ पथार्ने तथा तिनलाई राम्ररी सुकाउने इन्तजाम गर्छन्। ‘चिपरी’ घरगोठका भित्ताभरि पथारिन्छन्। सुक्दै गएपछि एक ठाउँमा थुपारिन्छ। ‘गोरहा’ भने पथारेर घाम लाग्ने ठाउँमा चाङ लगाएर सुकाइन्छ। यसरी बैशाख लागेपछि सुकेका ‘चिपरी’ र ‘गोरहा’ गोठको एकछेउ वा सानो छाप्रो बनाएर थन्क्याइन्छ। असारदेखि असोजसम्म त्यसको प्रयोग हुन्छ। 

‘खाने चामल, पीठो त बनिबुतोबाट पाइएला तर दाउराको धेरै समस्या पर्छ’, औरही  नगरपालिका-७ भोइलटिम्कियाकी भुट्टी सदा मुसहर भन्छिन्, ‘त्यसैले अहिलेदेखि नै पराले झुप्रामै गुइँठा राख्नु परेको हो।’  गुइँठा वर्षायाममा सहजताका लागि मात्रै होइन, यसमा पाकेका खानेकुरा स्वादिला हुने भएकाले पनि ग्रामीण बस्तीका साना किसान र कतिपय मध्यमवर्गीय परिवारको पनि रोजाइमा पर्ने गरेको छ।

गौशाला-६ जमुनियाँकी रामपरी थारू इन्धनका लागि अन्य साधनको जोहो गर्न नसक्ने आर्थिक रूपमा विपन्नहरूका लागि गुइँठाले निकै राहत दिने गरेको बताउँछिन्। बर्दिबास नगर कार्यपालिकाको कार्यालयको स्वास्थ्य शाखा प्रमुख तथा वरिष्ठ स्वास्थ्य निरीक्षक सुरेश पासवान गुइँठा मा पकाइएको खाना मौलिक स्वादको हुने र स्वस्थ्यकर पनि हुने भएकाले यो धेरैको रोजाइमा पर्ने  गरेको बताउँछन्। यद्यपि यसको धुवाँले खाना पकाउने गृहिणीको स्वास्थ्यमा अत्यन्त प्रतिकूल हुनेहुँदा विशेष सतर्कता आवश्यक रहेको उनको भनाइ छ।

‘खासगरी ग्रामीण महिलामा श्वासप्रश्वासको समस्या धेरैजसो भान्साघरको धुवाँबाटै हुने गरेको पाइन्छ, आर्थिक अवस्थाले वैकल्पिक इन्धनको जोहो गर्न नसक्नेहरूका लागि गुइँठाको प्रयोग अनिवार्य बाध्यता पनि हो’ स्वास्थ्य शाखा प्रमुख भन्छन्, ‘धेरै धुवाँ हुने गरी होइन, हावा ओहोरदोहोर हुने ठाउँमा खाना पकाउने र अन्य स्वास्थ्य सतर्कता अपनाउन जरूरी हुन्छ।’

महोत्तरीसहित मधेस प्रदेशका जिल्लामा धेरैजसो गोबर खाना पकाउने इन्धन प्रयोजनमा खपत हुने गरेको छ। यसले खेतीका लागि रासायनिक मलको निर्भरता बढाएको भंगाहा-४ रामनगरका ८० वर्षीय किसान दीपबहादुर फुयालको बुझाइ छ। ‘कम्पोष्ट मल बनाइने गोबर दाउरा बन्छ, कम्पोष्ट मल नभएपछि खेतबारी मलिलो हुन नसक्दा उत्पादन घट्दो छ। रासायनिक मलमा निर्भरता बढ्दो छ’ फुयालले भने।  

इन्धनमा गोबरको विकल्प खोज्नैपर्ने फुयालसहितका पाका किसानको मत छ। अर्का स्थानीय ८५ वर्षीय छविलाल दाहाल ‘कम्पोष्ट मलको अभावमा जग्गामा उत्पादन घटेको बताउँछन्। सरकारले किसानलाई ग्यास चुलो जडान गर्न उत्प्रेरित गर्न र गरिब जनतासम्म वनउपज (दाउरा) मा पहुँच दिन आवश्यक रहेको बताउँछन्। रासस