काठमाडाौं- वाणिज्य, आपूर्ति तथा उपभोक्ता संरक्षण विभागले जुत्ता उत्पादक संघ नेपाल र रसायन तथा मेडिकल आपूर्ति संघ नेपाललाई आफ्ना उत्पादनमा अधिकतक बिक्री मूल्य (एमआरपी) राख्न निर्देशन दिएको छ।

मंगलबार विभागका महानिर्देशक कुमारप्रसाद दहालकाे अध्यक्षतामा दुईवटै संघ पदाधिकारीसँग बसेको बैठकपछि विभागले उक्त निर्देशन दिएको हो। 

नेपालको संविधानको धारा ४४ को उपभोक्ताको हकको भावना र मर्मअनुरूप एवं उपभोक्ता संरक्षण ऐन, २०७५ को दफा ६ को उपदफा ३ बमोजिम उत्पादकले आफूले उत्पादन गरेका वस्तुमा तथा पैठारी गरिएको वस्तु भए पैठारीकर्ताले बिक्री वितरण गरिने वस्तुमा सर्वसाधारणले बुझ्ने गरी नेपाली वा अंग्रेजी भाषामा अनिवार्य लेबल लगाउनुपर्ने कानूनी व्यवस्था छ।

सोहीअनुसार ७ दिन भित्र आफ्ना उत्पादनमा नियमानुसार कार्य अघि बढाउन विभागले निर्देशन दिएको छ। 

विभागले निर्देशन बेवास्ता वा अटेर वा बर्खिलाप गरी लेबलबिनाका वस्तुहरू बजारमा बिक्रीवितरण प्रयोजनका लागि राखिएको भेटिएमा प्रचलित कानूनबमोजिम कारबाही हुनेसमेत बताइएको छ।