काठमाडौं- नेपाल नागरिक उड्डयन प्राधिकरणले नेपाल वायुसेवा निगमसँग पोखरा अन्तर्राष्ट्रिय विमानस्थलमार्फत उडान तालिका मागेको छ।

प्राधिकरणले मंगलबार परिपत्र गर्दै त्रिभुवन अन्तर्राष्ट्रिय विमानस्थल विस्तारको कार्य चलेको र धेरै उडानको अनुमती दिन नसकिने भन्दै पोखरामा सबै सेवा सुविधा नियमकले उपलब्ध गराएको भन्दै उक्त सेक्टरबाट उडान गर्ने विन्टर सिजनको सेडुल दिन प्राधिकरणले नेपाल वायुसेवा निगमलाई परिपत्र गरेको हो।

प्राधिकरणले हिमालयन एयरलाइन्ससँग पनि पोखरा उडानको सेडुल मागेको छ। अहिले गौतम बुद्ध अन्तर्राष्ट्रिय विमानस्थलबाट अहिले दैनिक ४ वटा उडान सुरु भएको छ। जसले भैरहवातिर होटल तथा पर्यटन व्यवसायी उत्साही भएका छन्।

प्राधिकरणका महानिर्देशक प्रदिप अधिकारीले अब पोखरामा पनि एयरलाइन्स कम्पनीलाई सुविधा दिएर उडान गराउन लागिपरेको बताए। भैरहवाबाट अझै धेरै उडानका लागि पहल भएको र पोखरातर्फ पनि उडानको तयारी थालिएको महानिर्देशक अधिकारीले जानकारी दिए।

त्रिभुवन अन्तर्राष्ट्रिय विमानस्थलमा निर्माणको कार्य चलेपछि १० घन्टा मात्रै संचालन भएको छ। जसका कारण पूर्वाधार तयार हुँदा पनि एयरलाइन्स कम्पनीहरु भैरहवा र पोखरा उडान गर्न नमानेपछि अहिले पनि भैरहवा उडान थालेका छन्।