बुधबार, असार १२ गते २०८१    
images
images

चामेमा जीर्ण काठेपुल हटाएर नयाँ पुल बनाइँदै

images
बिजनेस न्युज
बिजनेस न्युज
शुक्रबार, जेठ २५ २०८१
images
images
चामेमा जीर्ण काठेपुल हटाएर नयाँ पुल बनाइँदै

सडक खण्डका नौवटा काठेपुलको यात्रा गरेर तिलिचो ताल, थोराङ्ला भञ्ज्याङ पार गर्नुपर्ने भएकाले बाढीको समयमा यात्रा गर्न कठिन हुने गरेको छ।

images
images

मनाङ- मनाङको डुम्रे-बेँसीसहर-चामे सडक माथिल्लो मनाङ, तिलिचो ताल, खाङ्सार, थोराङ्ला भञ्ज्याङ (थोराङ्ला पास) आवतजावत गर्ने एकमात्र मार्ग हो। सडक निर्माण भएको लामो समय भइसकेको छ तर यस सडकमा रहेका खोला, खोल्सी पार गर्न काठेपुलकै भर पर्नुपरेको छ। यी पुल पनि जीर्ण बन्दै गएपछि आवतजावतमा समस्या छ। 

images
images
images

डुम्रे-बेँसीसहर-चामे सडक आयोजना कार्यालयका अनुसार सदरमुकाम चामेमा मात्रै चार ठाउँमा काठेपुल छन्। अरु बेला कामचले पनि वर्षायाममा भने जोखिमपूर्ण यात्रा गर्नुपरेको छ।

images

चामे-१ तिमाङस्थित तिमाङखोलामा, चामे-२ स्थित स्यार्कुखोला, चामे-४ स्थित दुईवटा घट्टेखोलामा काठेपुल नै आवतजावत गर्ने विकल्पका रूपमा छन्। 
   
आयोजना कार्यालयका सबइन्जिनीयर सुमन अधिकारीले बर्खा लाग्न थालेपछि चामेको दुईवटा घट्टेखोलामा नयाँ काठेपुल निर्माणकार्य अगाडि बढाइएको बताए।

images
images

उनले भने, 'पक्की मोटरेबल पुल निर्माण गर्न समय लाग्ने भएपछि वर्षात्मा सहज बनाउने उद्देश्यले नयाँ काठेपुल बनाइरहेका छौँ।' काठेपुल हटाएर पक्की पुल निर्माण गर्न विस्तृत परियोजना प्रतिवेदन (डीपीआर)का लागि सम्झौता भएको उनले जानकारी दिए।

images
images

'यस सडकखण्डअन्तर्गत १५ वटा पुल निर्माणका लागि डीपीआर भएको छ। बजेट प्राप्त भएपछि बोलपत्र आह्वान गरी काम अगाडि बढाउने तयारी छ। त्यसपछि काठेपुल विस्थापन हुनेछन्', अधिकारीले अगाडि भने। 

चामे गाउँपालिकाका अध्यक्ष लोकेन्द्रबहादुर घलेले दीर्घकालीनरूपमा समस्या समाधान हुने गरी पक्की पुल निर्माणका लागि आयोजनासँग पटकपटक समन्वय गरिएको बताए।

'हरेक वर्ष बर्खा लागेपछि काठका पुल बाढीले बगाएर आवतजावत नै रोकिने समस्या हुन्छ। एउटा काठेपुल निर्माणका लागि वर्षेनी पाँच/सात लाख खर्च गर्नुभन्दा छिटो पक्की पुल बनाउनुपर्छ भनेर हामीले पटकपटक आग्रह गरिसकेका छौँ। समयमै पुल बनेमा अन्य ठाउँमा उपयोग हुने बजेट काठेपुललाई छुट्याउनुपर्ने बाध्यता हट्थ्यो नि! त्यसैले आयोजनाले यसमा यथाशीघ्र पहलकदमी लिन आवश्यक छ', अध्यक्ष घलेको आग्रह छ।

उनले पालिका एक्लैले ठूला योजना पूरा गर्न नसक्ने भएकाले सङ्घ र प्रदेश सरकारले समस्या समाधान गर्नुपर्छ भनेर छलफल तथा समन्वय भइरहेको बताए। 

मनाङ पर्यटकीय क्षेत्रसमेत भएकाले यहाँ आउनेहरूले यही सडक प्रयोग गर्दछन् सडकमा काठेपुलमात्रै हुँदा सवारीसाधन आवतजावतमा कठिनाइ छ। सडक खण्डका नौवटा काठेपुलको यात्रा गरेर तिलिचो ताल, थोराङ्ला भञ्ज्याङ पार गर्नुपर्ने भएकाले बाढीको समयमा यात्रा गर्न कठिन हुने गरेको छ।

प्रमुख जिल्ला अधिकारी (प्रजिअ) सुवासकुमार लामिछानेले यही समस्या समाधानका लागि सडक आयोजनासँग पुल निर्माणबारे छलफल गरी पुल निर्माणकार्य अगाडि बढेको बताए।

पर्यटकीय क्षेत्रमा नै पुलको अभाव हुँदा हुने जोखिमलाई मध्यनजर गरी पुल निर्माणलाई प्राथमिकतामा राख्न आग्रह गरिएअनुरुप काम अगाडि बढेको उनले बताए।

'सधैँ काठेपुलबाट यात्रा गर्न सजिलो हुँदैन। यस विषयमा छलफल हुँदा पक्की पुल नबनेसम्म जीर्ण बनेका काठेपुल मर्मत गरेर समस्या समाधान गरिनुपर्छ भनेर केही काम अगाडि बढेका छन्', प्रजिअ लामिछानेले भने,'पटकपटकको छलफलपछि अहिले पुल निर्माणको काम भइरहेकाले यस वर्ष वर्षायाममा सहज यात्रा गर्ने वातावरण बन्ने छ। पक्की पुलको काम पनि छिटो अगाडि बढाउन आयोजनाले तयारी गरिरहेको बुझिएको छ , त्यसपछि मात्र समस्याको दीर्घकालीन समाधान हुनेछ।' रासस


प्रकाशित : शुक्रबार, जेठ २५ २०८१०१:२६
प्रतिक्रिया दिनुहोस
कार्यकारी सम्पादक

केदार दाहाल

सूचना तथा प्रसारण विभाग दर्ता नम्बर

२८३८/०७८-७९

© 2024 All right reserved to biznessnews.com  | Site By : SobizTrend