काठमाडौं- चालु आर्थिक वर्षको ३ महिना (साउनदेखि असोज) सम्म २ हजार १ सय ३५ वटा विद्युतीय कार आयात भएको छ। यो वर्षको असोज महिनामा मात्र १ हजार २ सय ३७ वटा विद्युतीय कार आयात भएको भन्सार विभागको तथ्यांक छ।

विभागको तथ्यांकअनुसार चालु आवको असोजमा इतिहासमै एकै महिनामा सबैभन्दा बढी विद्युतीय कार भित्रिएको हो। यसअघि २०८० को जेठमा ९ सय २५ वटा विद्युती कार नेपाल भित्रएको थियो।

चाडपर्व र नाडा अटो शो २०२३ का लागि लक्षित गर्दै विद्युतीय कार आयात बढेको हो। साउन र भदौमा ८ सय ९८ वटा विद्युतीय कार आयात भएको थियो भने असोजमा मात्रै १ हजार २ सय ३७ वटा विद्युतीय सवारी आयात भएको हो। 

तीन महिनामा आयात भएको कुल विद्युतीय सवारीमा सबैभन्दा धेरै ५१ सय १०० किलोवाटसम्मका सवारी आयात भएको छ। यी विद्युतीय कार भारत र चीनबाट आयात भएका हुन्। ३ महिनामा ५१ देखि १ सय किलोवाटसम्मका मात्रै ११ सय ६६ वटा विद्युतीय सवारी नेपाल भित्रिएको छ।

यसैगरी ५० किलोवाटसम्मको ९ सय ५४ वटा, १०१ देखि २ सय किलोवाटसम्मको १२ वटा र २०१ किलोवाट माथिका ३ वटा विद्युतीय सवारी नेपाल भित्रिएको छ। ३ महिनामा ५ अर्ब १७ करोड ७१ लाख २५ हजार रुपैयाँ मूल्य बराबरका २ हजार १ सय ३७ वटा विद्युतीय कार आयात हुँदा २ अर्ब २४ करोड २१ लाख  ७५ हजार रुपैयाँ सरकारले कर पाएको छ।

विभागका अनुसार साउनमा १ सय १० वटा, भदौमा ७ सय ८८ वटा र असोजमा १ हजार २ सय ३७ वटा विद्यतुीय कार नेपाल भित्रिएको हो।

तीन महिनामा कुन देशबाट कति विद्युतीय कार आयात?

तीन महिनामा चीनबाट ५० किलोवाटसम्मका ५ वटा, ५१ देखि १०० किलोवाटसम्मका १ हजार ३५ वटा, १०१ देखि २०० किलोवाटसम्मका ८ वटा, २०१ देखि ३०० किलोवाटसम्मका ३ वटा विद्युतीय कार आयात भएको छ।

त्यस्तै भारतबाट ५० किलोवाटसम्मका ९ सय ४२ वटा, ५१ देखि १०० किलोवाटसम्म १ सय ३१ वटा आयात भएको छ भने जर्मनीबाट १०१ देखि २ सय किलोवाटसम्मको २ वटा विद्युतीय कार आयात भएको छ। 

इन्डोनेसियाबाट ५० किलोवाटसम्मका ७ वटा विद्युतीय कार आयात भएको भन्सार विभागको तथ्यांकमा उल्लेख छ।  यसैगरी कोरियाबाट १०१ देखि २०० किलोवाटसम्मका २ वटा कार नेपाल भित्रिएको छ।

सबैभन्दा धेरै विद्युतीय कार नेपालमा भारतबाट आएको छ। भारतबाट ३ महिनामा १ हजार ७३ वटा विद्यतुीय कार नेपाल आएको छ। यसैगरी दोस्रोमा धेरै चीनबाट १ हजार ५१ वटा विद्यतुीय कार नेपाल आएको छ।