कर्णाली- लक्पी स्किन संक्रमणका कारण कर्णाली प्रदेशमा साढे दश हजार पशुचौपाया मरेको यहाँको पशुपक्षी विकास निर्देशनालयले जनाएको छ।

निर्देशनालयका निमित्त निर्देशक कृष्णप्रसाद पंगेनीका अनुसार दुई लाख २७ हजार दुई सय ६७ बाच्छाबाच्छी, गाई, गोरु, भैँसी र चौरी संक्रमित भएमध्ये यही साउन २१ गतेसम्म प्रदेशका दश जिल्लामा १० हजार चार सय ५० पशुचौपाया मरेका हुन्।

'पछिल्लो समय कालीकोट, जुम्ला र डोल्पामा पनि लम्पी स्किनका कारण पशुचौपाया मरेका छन्', उनले भने। उनका अनुसार जाजरकोटमा २३ हजार ६५ पशुमा यो रोगको संक्रमण देखिएकोमा दुई हजार आठ सय ७७ मरेका छन्। साथै कालीकोटका २९ हजार पाँच सय ४१ संक्रमित पशुमध्ये एक हजार ५८ पशु चौपाया मरिसकेका छन्। हुम्लामा कुल १३ हजार पाँच सय ९८ पशु चौपाया संक्रमित भएकोमा प्राप्त एक हजार ९८३ मरिसकेका छन्।

पशु चिकित्सक डा सबिना मल्लका अनुसार सुर्खेतमा २९ हजार पाँच सय ४१ संक्रमित पशुमध्ये एक हजार ५८ र सल्यानमा ३४ हजार चार सय ७९ संक्रमित पशुमध्ये एक हजार २३ मरिसकेका छन्। साथै दैलेखमा ७५ हजार तीन सय ६६ संक्रमितमध्ये छ सय २१ पशु चौपाया मरिसकेका छन्। 

साथै जुम्लामा १४ हजार ४१ संक्रमितमध्ये पाँच सय ७३, डोल्पामा सात हजार पाँच सय २९ संक्रमितमध्ये पाँच सय ४३, रुकुम पश्चिममा १७ हजार छ सय ४१ संक्रमितमध्ये चार सय ६९ पशु मरिसकेका छन्। 

निर्देशक पंगेनीले बढ्दै गएको लम्पी स्किनको संक्रमण नियन्त्रण गर्न आवतजावतमा बन्द गरिएको र घाउ खटिरा आएका पशुमा मलहम लगाउने गरिएको बताए। साथै सबै जिल्लामा पशु प्राविधिक खटाइएको उनको भनाइ छ।

भूमि व्यवस्था, कृषि तथा सहकारी मन्त्रालय कर्णाली प्रदेशका प्रवक्ता धनबहादुर कठायतले लम्पी स्किन रोगबाट संक्रमित दुई लाख २७ हजार दुई सय ६७ पशुचौपायामध्ये एक लाख ५५ हजार एक सय १८ को उपचार गरिएको र १३ हजार ४६ मा खोप लगाइएको जानकारी दिए। रासस