काठमाडौं- नेपाल राष्ट्र बैंकका गभर्नर महाप्रसाद अधिकारीले सूचना प्रविधि नेपालका लागि विदेशी मुद्रा आर्जनको प्राथमिक क्षेत्रका रुपमा उदय हुन सक्ने सम्भावना रहेको बताएका छन्।

सर्वाङ्गीण विकास अध्ययन संस्था (आईआईडीएस) ले आयोजना गरेको कार्यक्रममा गभर्नर अधिकारीले सूचना प्रविधिको विकास र विश्व अर्थतन्त्रमा यसले सिर्जना गरेको लाभसँग जोडिने हो भने नेपालले पनि लाभ लिन सक्ने सम्भावना रहेको बताएका हुन्।

नेपालका लागि रोजगारी सिर्जनाको विषयमात्र नभएर सूचना प्रविधिको सेवा निर्यातबाट विदेशी मुद्रा आर्जनको भरपर्दो स्रोतका रुपमा विकास हुने सम्भावना देखिएको उनको भनाइ छ।

आईआईडीएसले सूचना प्रविधि सेवाको अवस्था तथा सम्भावनाका बारेमा गरेको अध्ययनले नेपालमा अहिले नै ५ प्रतिशतभन्दा बढी विदेशी मुद्रा सूचना प्रविधिबाट आर्जन भएको र ६६ हजारभन्दा बढीले रोजगारी पाएको देखाएको छ।

नेपाल सरकार आफैले पनि यो क्षेत्रलाई प्राथमिकता दिएको र आन्तरिक बजार लक्षित गतिविधि पनि बढ्दै गएको उनको भनाइ छ। नेपाल राष्ट्र बैंकले सूचना प्रविधिको क्षेत्रलाई दुई तरिकाले सहायोग गरिरहेको उनले बताए। आन्तरिक प्रयोग र सेवा उद्योगको विकास लक्षित राष्ट्र बैंकले काम गरिरहेको उनको भनाइ छ।