काठमाडौं- आर्थिक वर्ष २०७९/८० मा नेपाल सरकारको सार्वजनिक ऋण २ खर्ब रुपैयाँभन्दा बढीले थपिएको छ। सार्वजनिक ऋण व्यवस्थापन कार्यालयको तथ्यांक अनुसार आर्थिक वर्ष २०७९/८० को अन्तिमसम्म कूल सार्वजनिक ऋण २२ खर्ब २१ अर्ब ६७ करोड रुपैयाँ पुगेको छ। 

नेपालको सार्वजनिक ऋणको इतिहासमा पहिलोपटक वैदेशिकभन्दा आन्तरिक ऋण भएको छ। कार्यालयका अनुसार हाल ११ खर्ब २८ अर्ब ३२ करोड आन्तरिक ऋण र १० खर्ब ९३ अर्ब ३४ करोड वैदेशिक ऋण पुगेको छ। 

अघिल्लो वर्षको अन्त्यसम्म कूल सार्वजनिक ऋण २० खर्ब १३ अर्ब २९ करोड रुपैयाँ रहेको थियो। यसमा गएको आर्थिक वर्ष नेपाल सरकारले कूल ३ खर्ब ५८ अर्ब ११ करोड ऋण लिएको थियो। सो अवधिमा कूल १ खर्ब ४९ अर्ब ७३ करोड सावाँ भुक्तानी गरेको छ। 

लिएको ऋण थपेर तिरेको ऋण घटाउँदा गएको वर्ष खुद ऋण २ खर्ब ८ अर्ब ३८ करोड थपिएको हो। 

गत आर्थिक वर्षमा नेपाल सरकारले २ खर्ब ५५ अर्ब ९९ करोड ७७ लाख आन्तरिक ऋण उठाएको छ। सरकारले लक्ष्यभन्दा २३ लाख रुपैयाँ न्यून आन्तरिक ऋण उठाएको छ। 

‍वैदेशिक ऋण भने सरकारले जम्मा १ खर्ब २ अर्बमात्र परिचालन गरेको छ। 

गत वर्ष सरकारले १ ख्ब १५ अर्ब आन्तरिक ऋणको सावाँ भुक्तानी गरेको छ भने ३४ अर्ब ६१ करोड वैदेशिक ऋणको सावाँ भुक्तानी गरेको छ।