काठमाडौं- प्रधानमन्त्री पुष्पकमल दाहाल ‘प्रचण्ड’सँग मिटरब्याज पीडितले आज भेट गरेका छन्। शनिबार बिहान बालुवाटारस्थित प्रधानमन्त्री निवासमा भेटवार्ता भएको हो।

तराईबाट ११ दिन हिँडेर केही दिनअघि काठमाडौं आइपुगेका मिटरब्याज पीडित प्रधानमन्त्रीसँगको भेटमा ६ बुँदे मागसहितको ज्ञापनपत्र बुझाउँदै मिटरब्याजबाट मुक्त गर्न आग्रह गरेका थिए। 

उनीहरुले मिटरब्याजको शक्तिशाली आयोग गठन गर्नुपर्ने र उक्त आयोगलाई कार्यकारी अधिकार दिनुपर्ने,मिटरब्याजलाई आर्थिक अपराधको रुपमा कानूनी दायराभित्र ल्याउनका लागि गरिने कानुन संसोधनको ड्राफ्ट वार्ता समितिमा पेस हुनुपर्ने माग राखेका छन्। 

यस्तै तमसुकका आधारमा चलाइएका मुद्दाहरु स्थगन गर्न, जारी पक्राउ पुर्जी स्थगन गर्न, जेल चलान गरिएका मुद्दाहरुमा समेृत सम्बन्धित निकायसँग समन्वय गरी पीडितलाई न्याय दिलाउन महान्यायाधिवक्ताको कार्यालयबाट कार्यान्वयनका लागि सहमति पत्र पेस गर्न समेत उनीहरुले माग गरेका छन्। उनीहरुले प्रधानमन्त्रीसमक्ष आफूहरुको माग पूरा हुने वातावरण नभएसम्म घर नफर्किने समेत अडान राखेका छन्। 

उनीहरुसँगको छलफलमा प्रधानमन्त्री दाहालले समस्या समाधानमा सरकार गम्भीर भएर लागेको बताए। उनले पीडितको सबै माग सम्बोधन गर्ने प्रतिबद्धता समेत जनाए। 'तपाईंहरूको सबै माग पूरा हुन्छ', उनले भने, 'यो ठूलो मुद्दा हो, तपाईंहरूले जित्नुपर्छ। हामी सबैले जित्नुपर्छ।'

पीडितहरुसँग गृहमन्त्रालयले तीन चरणको वार्ता गरिसकेको छ। अधिकारसम्पन्न आयोग गठन गर्नुपर्नेलगायतका माग भने गृहमन्त्रालयले सम्बोधन गरिसकेको छ।