ललितपुर- गोदावरी राष्ट्रिय वनस्पति उद्यानको आम्दानी बढेको छ। कोरोना महामारीका कारण लगातार दुई वर्ष आम्दानी घटे पनि यो वर्ष भने आम्दानी बढेको हो। 

उद्यानका सूचना अधिकारी गौरव परमारले यो वर्ष यहाँ घुम्न आउने आन्तरिक र बाह्य पर्यटकको संख्या बढेसँगै आम्दानी पनि बढेको बताए। उनका अनुसार यो वर्ष वैशाखदेखि फागुनसम्म टिकट बिक्रीबाट मात्रै एक करोड ७९ लाख ९१ हजार पाँचसय ४० रूपैयाँ आम्दानी भएको छ। ‘कोरोना महामारीको समयमा २०७७ र २०७८ सालमा जम्मा ७८ लाख ३६ हजार ७ सय ५८ रूपैयाँ आम्दानी भएको थियो’, उनले भने, ‘यस वर्ष भने राम्रो आम्दानी भएको छ।’ 

उद्यान घुम्नका लागि ११ महिनामा तीन लाख २८ हजार नौसय ६० जना आन्तरिक पर्यटक र एक हजार आठसय २१ जना विदेशी पर्यटक यहाँ आएको उनले जानकारी दिए। उद्यानमा प्रत्येक वर्ष औसतमा चार लाखभन्दा बढी विद्यार्थी उद्यान भ्रमणका लागि आउने गरेको उनको भनाइ छ। 

विसंं २०१९ कात्तिक १२ मा राजा महेन्द्रले उद्घाटन गरेको शाही वनस्पति उद्यानको नाम परिवर्तन गरी विसं २०६३ असार १९ मा राष्ट्रिय वनस्पति उद्यान बनाइएको थियो। उद्यान भ्रमणमा आउनेहरुको सुविधाका लागि खाजा घर, विद्युतीय सवारीबाट अवलोकनको व्यवस्था गरिएको छ।

साथै आन्तुकले यहाँ विभिन्न प्रजातिका बिरूवा खरिद गर्न पनि सक्छन्। उद्यानमा सामान्यतया विद्यार्थीहरु शैक्षिक भ्रमणमा आउने गरेका छन् भने वनस्पति अनुसन्धानकर्ताका लागि पनि यो गन्तव्य बन्दै आएको छ। रासस