काठमाडौं- सरकारले नागढुंगा-नौबिसे-मुग्लिन सडक विस्तारका लागि सीमा खाली गर्न घर टहरा हटाउन स्वीकृति दिने निर्णय गरेको छ। सडक निर्माण हुने सीमाभित्र पर्ने १२१ वटा घर टहरा क्षतिपूर्ति दिएर हटाउन स्वीकृति दिइएको हो। 

यो सडकलाई विस्तार गरेर चार लेनको बनाउन सडक विभागले यसअघि नै ठेक्का सम्झौता गरिसकेको छ। ठेक्का सम्झौता भएर काम सुरू हुने समयमा सरकारले बल्ल घर टहरा हटाउने निर्णय गरेको हो।

९५ किलोमिटर दुरी रहेको यो सडकखण्ड विस्तारका लागि सडक विभागले यसअघि नै तीन प्याकेज बनाएर ठेक्का सम्झौता गरिसकेको छ। ११ अर्ब ४४ करोड ६२ लाख रुपैयाँमा कुल ठेक्का सम्झौता भएको छ। 

यो सबै काम सकिँदा सडकको बजार क्षेत्र चार लेनको हुनेछ भने अन्य क्षेत्रमा दुई लेन हुनेछ। यो सडक निर्माण भएपछि काठमाडौं भित्रिने र बाहिरिने सडक ट्राफिक सहज हुने छ। यसअघि नागढुंगा-पोखरा सडक चिनियाँ सहायतामा निर्माण भएको थियो। अहिले नेपाल सरकारले विस्तार गर्न लागेको हो।