काठमाडौं- त्रिभुवन अन्तर्राष्ट्रिय विमानस्थलमा रहेको अध्यागमन कार्यालयमा इन्टरनेट अवरुद्ध हुँदा झन्डै दुई घण्टा उडान प्रभावित भएको छ। 

विमानस्थल अध्यागमन कार्यालयमा हरेको इन्टरनेट कनेक्सनको आन्तरिक प्रणालीमा समस्या आउँदा समग्र अध्यामन सेवा प्रभावित भएको थियो। सेवा प्रभावित हुँदा उडान तथा अवतरण पनि ढिला भएको थियो। 

दिउँसो १२ बजेदेखि इन्टरनेट कनेक्सनमा समस्या आउँदा उडान प्रभावित भएका छन्। 

अध्यागमन विभागका प्रवक्ता कमलप्रसाद पाण्डेका अनुसार अहिले यो समस्या समाधान भइसकेको छ। अध्यागमन कार्यालयमा दुईवटा इन्टरनेट सेवाप्रदायकको कनेक्सन रहेको छ। सेवाप्रदायकको कारणलेभन्दा पनि आन्तरिक वितरण प्रणालीमै समस्या आएकाले सेवा अवरुद्ध भएको थियो। 

अध्यागमनले दिने अधिकांस सेवा अनलाइनमा आधारित हुने भएकाले कनेक्सनमा समस्या आउनेवित्तिकै उडान पनि प्रभावित हुँदै आएको छ। केही समय पहिले सर्भर डाउन हुँदा करिब चार घण्टा उडान अवरूद्ध भएको थियो।