पर्सा- वीरगञ्ज महानगरपालिकाले सडक, फुटपाथ तथा नाला अतिक्रमण गरी बनाइएका संरचना हटाउने भएको छ। अतिक्रमित संरचना हटाउन महानगरपालिकाले सातदिने सूचना जारी गरेको छ।

तोकिएको अवधिभित्र संरचना नहटाए महानगर आफैँले हटाउने जनाएको छ। यसरी हटाउँदा लागेको खर्च सम्बन्धित व्यक्तिबाटै असुल गरिने सूचनामा उल्लेख  छ।

महानगरपालिकाले अतिक्रमित भूमि फिर्ता ल्याउनुका साथै अतिक्रमण गरेर बनाइएका संरचना हटाउने अभियान सञ्चालन गरेको महानगरको भौतिक पूर्वाधार समितिका संयोजक प्रदीपकुमार चौरसियाले बताएका छन्। 

काठमाडौं महानगरपालिकाका मेयर बालेन्द्र शाहले अतिक्रमित संरचना हटाउने कार्यलाई निरन्तरता दिइरहँदा देशभरका स्थानीय तहहरूले पनि क्रमश: अतिक्रमित संरचनामाथि डोजर चलाइरहेका छन्। कतिपय स्‍थानमा स्थानीयहरूले विरोध गरिरहे पनि अतिक्रमित संरचना हटाएर खुला सहर विकासको काम निरन्तर भइरहेका छन्।