काठमाडौं- नेपाली बजारमा सुनको मूल्यले नयाँ रेकर्ड कायम गरेको छ। सुनको मूल्य हालसम्मकै महँगो हुँदै प्रतितोला १ लाख ७ हजार ५ सय रुपैयाँ पुगेको हो। 

यसअघि माघ १२ गते नेपाली बाजरमा सुनको मूल्यले रेकर्ड कायम गरेको थियो। सो दिन नेपाली बजारमा सुनको मूल्य प्रतितोला १ लाख ६ हजार ९ सय रुपैयाँमा कारोबार भएको थियो। 

बुधबारको तुलनामा बिहीबार सुनको मूल्य तोलामा १२ सय रुपैयाँ र चाँदी २५ रुपैयाँ बढेको हो। बुधबार छापावाल सुन प्रतितोला १ लाख ६ हजार ३ सय रुपैयाँमा कारोबार भएको थियो। बिहीबारका लागि छापावाल सुनको मूल्य तोलामा १ हजार २ सय रुपैयाँ बढेर १ लाख ७ हजार ५ सय रुपैयाँ कायम भएको छ। 

त्यस्तै चाँदीको मूल्य पनि तोलामा २५ रुपैयाँ बढेको हो। बिहीबारका लागि चाँदीको मूल्य १३ सय ९५ रुपैयाँ तोकिएको छ। बुधबार चाँदी प्रतितोला १३ सय ७० रुपैयाँमा कारोबार भएको नेपाल सुनचाँदी व्यवसायी महासंघले जनाएको छ।