धनकुटा- बाँसबाट बनेका विभिन्न सामग्रीले बजारको माग धान्न  मुश्किल परेको छ। यस्ता सामग्रीको माग स्वदेशमा मात्र होइन, विदेशमा पनि उत्तिकै रहेको छ। 

सहिदभूमि गाउँपालिका-६ का ज्ञानकुमार राई बजारले माग गरेको आधा पनि बाँसबाट बनेका सामग्री आपूर्ति गर्न नसकेको बताए। विगत २३ वर्षदेखि बाँसको काम गर्दै आएका ४० वर्षीया राईले नेपालका विभिन्न सहरलगायत चीन, हङकङ, जापानमा सामग्री निर्यात गर्दै आएका छन्। 

उनले गाउँमा नै सञ्चालन गरेको सुनिता बेदबाँस उद्योगबाट दैनिक एक सय ५० थानको हाराहारीमा बाँसका सामग्री उत्पादन गरेर बिक्री गर्दै आएका छन्। तर बजारमा भने दैनिक १२ सयदेखि १५ सयसम्मको माग रहेको जनाइएको छ। 'काम गर्ने जनशक्ति नभएर मागेको जति पुर्‍याउनै सकिएको छैन', उनले भने, 'बाँसको काम अलि गाह्रो भएर होला सबै विदेश गएर मान्छे पाइँदैन।'

स्थानीय तहहरूले बेदबाँस सामग्री उत्पादनका लागि दक्ष जनशक्ति उत्पादन गर्न सहयोग गरे बाँससम्बन्धी उद्योगलाई टेवा पुग्ने राईको भनाइ छ। विसं २०७८ मा एक लाख रुपैयाँको लागतमा स्थापन भएको राईको उद्योगले दैनिक तीन जनालाई रोजगारी दिएर ३० देखि पाँच हजार रुपैयाँसम्मका पाँच सय प्रकारका बाँसका सामग्री उत्पादन गर्दै आएको छ।

मासिक ६० हजारसम्मको कारोबार गरेर ४० हजार रुपैयाँसम्म कमाइ गर्न राईले यही पेसाबाट कमाएर मोरङको विराटचोकमा १० धुर जमिनसमेत जोडेको जानकारी दिए। त्यस्तै सहिदभूमि गाउँपालिका घर भइ हाल धनकुटा नगरपालिका-७ मा धनुबाँस निगालो उद्योगका सञ्चालक चन्द्रप्रकाश राईले पनि कामदार अभावमा बजार माग पूरा गर्न नसकिरहेको जानकारी दिए। 

बजारमा दैनिक दुई हजार पाँच सय थानाभन्दा बढी माग भए पनि उद्योगले दैनिक आठ सयदेखि एक हजार थानसम्म बाँसको चोयाबाट बनेका सामग्री उत्पादन गरेर दिइरहेको उनले जानकारी दिए। 'सामान बनाउन सके बजारमा जति पनि बिक्छ, तर के गर्नु काम गर्ने मान्छे पाइँदैन', उनले भने।

विसं २०६८ मा २० हजार रुपैयाँ लगानीमा उद्योग स्थापना गरेका ४० वर्षीय राईले हाल काडमाडाैं, भारत र जापान, सिंगापुर, अष्ट्रेलिया सामग्री पठाउने गरेको जनकारी दिए। दैनिक पाँच जनालाई रोजगार दिइरहेका राईले मासिक सात लाख रुपैयाँसम्मको कारोबार गरी एक लाख ५० हजार रुपैयाँसम्म कमाइ गरिरहेको जानकारी दिए। 

उनले बाँसको सामग्री बनाएर बेचेको कमाइबाट मोरङको बेलबारीमा ३५ लाख रुपैयाँ बराबरको घडेरीसमेत जोडेको सुनाए। सबैले उद्योग सञ्चालन गर्न नसक्ने र ज्यालामा काम गर्दा जीवनयापन नहुँदा बाँसका सामग्री बनाउने कामदार अभाव भएको घरेलु तथा साना उद्योग विकास समिति धनकुटाका प्रमुख ईश्वर थापाले जानकारी दिए। 

आफ्नो कार्यालयले बाँसका काम गर्नेलाई पर्याप्त मात्रामा तालिम दिँदै आएको भए पनि वैदेशिक रोजगारीको आकर्षणका कारण यस क्षेत्रमा काम गर्नेको अभाव भएको उनको भनाइ छ। जिल्लामा हाल १७  बाँससम्बन्धी उद्योग रहेको विकास समितिको तथ्यांक छ। रासस