म्याग्दी- सिँचाइ तथा जलस्रोत व्यवस्थापन आयोजना कार्यालय पोखरामार्फत म्याग्दी, मुस्ताङ र पर्वतमा चालु आर्थिक वर्ष २०८२/८३ मा करिब १२ करोड लागतमा १७ आयोजना कार्यान्वयन भएका छन्। 

पर्वतमा तीन, म्याग्दीमा चार र मुस्ताङमा १० योजना निर्माणका लागि विभिन्न कम्पनीहरुसँग ११ करोड ९३ लाख ७३ हजार ७४३ रुपैयाँमा ठेक्का सम्झौता भएको आयोजना कार्यालयले जनाएको छ। 

विसं २०८२ माघ, फागुन र चैत महिनामा ठेक्का सम्झौता भएका १७ वटै योजना चालु आर्थिक वर्षमै सम्पन्न गर्ने लक्ष्यसहित ठेक्का सम्झौता भएका आयोजनाका इन्जिनियर नरजंग गुरुङले जानकारी दिए। 

'ठेक्का सम्झौता गरेका सबै योजनाका निर्माण व्यवसायी कार्यक्षेत्रमा परिचालित भएका छन्', उनले भने, 'आगामी असार १९ गतेसम्म ठेक्काको म्याद भएका सबै योजना निर्माण कार्य धमाधम भइरहेको छ।'

म्याग्दीको रघुगंगा गाउँपालिका-४ दग्नामको पहिरो नियन्त्रण योजनाका लागि दुई करोड २५ लाख ६९ हजार ९२९ रुपैयाँमा र बेनी नगरपालिका-७ मंगलाघाट बस्ती संरक्षण योजनाका लागि ९९ लाख १९ हजार २९५ रुपैयाँमा ठेक्का सम्झौता भएको छ। 

अन्नपूर्ण गाउँपालिका-३ दानाको घट्टेखोला संरक्षण योजनाको ८७ लाख ४४ हजार ९८२ र अन्नपूर्ण-४ घराप बस्ती संरक्षण योजनाको एक करोड नौ लाख १६ हजार ७६० रुपैयाँमा ठेक्का सम्झौता भएको छ। 

मुस्ताङको वारागुङ मुक्तिक्षेत्र-४ कागबेनीको बस्ती संरक्षण योजनाको एक करोड ९१ लख ४३ हजार ६९९, थासाङ गाउँपालिका-२ लार्जुङखोला संरक्षणका लागि ७८ लाख ४४ हजार ९८२, लुप्रा गाउँ संरक्षण योजनाको २६ लाख ८२ हजार ४५ र तिरिगाउँ स्याउ बगैँचा संरक्षण योजनाको २५ लाख ९७ हजार १०३ रुपैयाँमा ठेक्का सम्झौता भएको योजना कार्यालयले जनाएको छ। 

कार्यालयमार्फत मुस्ताङको घरपझोङ गाउँपालिकाको मार्फा, वारागुङ मुक्तिक्षेत्रको फल्याक, झोङ, ढाकारजुङ, झोङ-फल्याक, छुसाङ र झारकोट सिँचाइ योजना कार्यान्वयन भएका छन्। 

पर्वतको फलेवास नगरपालिका-३ लमायखोलामा बहुउद्देश्यीय तलाउन निर्माण गर्न ३२ लाख ३५ हजार ९३९, कुश्मा नगरपालिका-१० को उपल्लो बिर्ता माझीको खोला सिँचाइ योजना १५ लाख ५२ हजार ५७५ र जलजला गाउँपालिका-७ मिलनचोकमा लुङ्दीखोला संरक्षण योजनाको ९१ लाख ७८ हजार ९२० रुपैयँमा ठेक्का सम्झौता भएको छ। रासस