बागलुङ- बागलुङको जैमिनी क्षेत्रमा भोट माग्न जाने उम्मेदवारलाई मतदाताले चुनाव जितेर बाँदर नियन्त्रण गर्ने नीति ल्याउन आग्रह गरेका छन्। आगामी फागुन २१ गते हुने प्रतिनिधिसभा सदस्य निर्वाचनका लागि मत माग्न गाउँमा पुगेका उम्मेदवारलाई मतदाताले बाँदर आतंकले गाउँमा बस्न गाह्रो भएको गुनासो पोखेका हुन्।

जैमिनी नगरपालिका-५ की कुमारी थापाले बसाइँसराइका कारण गाउँ रित्तो हुँदै गएपछि बाँदर गाउँका घरमा बस्न थालेको बताइन्। बारीमा लगाएको बालीदेखि घरमा राखेको सबै सामान बाँदरले नष्ट गरी दिँदा गाउँमा बस्न सक्ने अवस्था नभएको उनको भनाइ छ। टोल छिमेकी सबै बजार झरेको भन्दै गाउँमा बस्ने वातावरण बनाउने नेतालाई जिताउनुपर्ने थापा बताउँछिन्।

'बाँदरले गाउँमा बस्न गाह्रो बनाइसक्यो। न बारीका बाली राम्रो हुन दिन्छ, न घरमा राखेका सरसामान सुरक्षित हुन्छन्। यस्तो अवस्थामा कसरी गाउँमा बस्न सकिन्छ र?' उनले भनिन्, 'पहिलो मान्छे विकास नभएर बजार झरे, अहिले विकास भएको छ तर बाँदरका कारण गाउँ छोड्नुपर्ने अवस्था आएको छ। जसले बाँदर नियन्त्रण गर्ने योजना ल्याउँछ उसैलाई भोट दिने हो।'

स्थानीय प्रतिमा पौडेलले केटाकेटी र वृद्धवृद्धालाई गाउँमा एक्लै बस्न समस्या हुने गरेको बताइन्। पहिले वनमा बस्ने बाँदर हिजोआज गाउँमा बस्न थालेको भन्दै केटाकेटी र बूढाबूढीलाई आक्रमण गर्न आउने उनले  बताइन्। घर छोडेर मेलापातमा जाँदा एक-दुई जना घरकुरुवालाई राखेर जानुपर्ने बाध्यता रहेको उनले सुनाइन्।

उनले भनिन्, 'पछिल्लो पाँच वर्षदेखि गाउँमा बाँदरले आतंक मच्चाएको छ। हुनेखानेहरू सबै सहर बजार गइसके, गाउँमा हुने त उही सामान्य परिवारका मात्रै छन्। पहिले पहिले गाउँमा धेरै मान्छेहरू भएर होला बाँदर डराउँथे, अहिले त धपाउन खोज्दा उल्टै आक्रमण गर्न आउँछन्। यो हिसाबले गाउँमा बस्न सक्ने अवस्था छैन। चुनावमा भोट माग्न आउने नेतालाई बाँदर नियन्त्रण गरी गाउँमा बस्ने वातावरण मिलाइदिन अनुरोध गरेका छौँ।

बरेङ-१ तमबहादुर विकले जनताको माग र आवश्यकतालाई बुझेर काम गर्ने नेतालाई भोट दिने बताए। धेरै थरीका नेताहरू भोट माग्न आइरहेको उनको भनाइ छ। यसपालि किसानका समस्या बुझ्ने उम्मेदवारलाई भोट दिने उनले बताए। रासस