म्याग्दी- यस वर्ष म्याग्दीमा ३१ करोड ६० लाख रुपैयाँबराबरको सुन्तला उत्पादन भएको छ। सुन्तला म्याग्दीको प्रमुख नगदेबाली हो। ४३० हेक्टर क्षेत्रफलमा प्रतिहेक्टर १० दशमलव ५ मेट्रिकटनका दरले ४ हजार ५१५ मेट्रिकटन सुन्तला उत्पादन भएको कृषि विकास कार्यालय म्याग्दीले जनाएको छ।

जिल्लाका विभिन्न ठाउँका बगैँचामा बाली कटानी गरेर सुन्तला उत्पादनको तथ्यांक संकलन गरिएको कार्यालयका प्रमुख सञ्जीव बाँस्तोलाले जानकारी दिए। '४३० हेक्टर जमिनको बगैँचामा सुन्तला उत्पादन भएको छ,' उनले भने, 'किसानले सरदर प्रतिकिलो ‍७० रुपैयाँका दरले ३१ करोड ६० लाख रुपैयाँबराबरको सुन्तला बिक्री गरेका छन्।'

म्याग्दीको ८३५ हेक्टर क्षेत्रफलमा सुन्तलाको बगैँचा छ। गत वर्ष ४२५ हेक्टर क्षेत्रफलमा प्रतिहेक्टर ११ दशमलव २५ मेट्रिकटनका दरले ४ हजार ७८१ मेट्रिकटन सुन्तला उत्पादन भएको थियो। गत वर्ष ३४ करोड रुपैयाँबराबरको सुन्तला बिक्री भएको थियो।

गत वर्षको तुलनामा ५ दशमलव ५६ प्रतिशतले उत्पादन घटेको हो। यस वर्ष विभिन्न रोग-कीराको संक्रमण नभए पनि बोटमा दाना पातलो लागेकाले उत्पादन घटेको कार्यालय प्रमुख बाँस्तोलाले बताए।

'यस वर्ष मौसमले साथ दिएको हो। रोग-कीरा नदेखिएको र विपद्ले क्षति नगरे पनि यसपालि दाना कम लागेको छ', बाँस्तोलाले भने, 'एक वर्ष अत्यधिक फल्ने र अर्को वर्ष कम दाना लाग्ने सुन्तलाखेतीको प्राकृतिक विशेषताका कारण उत्पादनमा असर परेको हो।'

सुन्तलाखेती हुने जमिनको क्षेत्रफल र मूल्य बढे पनि उत्पादकत्वमा कमी आएको हो। गत वर्ष प्रतिकिलो ६५ रुपैयाँका दरले सुन्तला बेचेका किसानले यस वर्ष प्रतिकिलो ५ रुपैयाँ बढी मूल्यमा बिक्री गरेका छन्।

राखु, मरेक, सुर्केमेला, बरङ्जा, भेँडाबारी, अर्मन, रुन्मा, बिम, ओखरबोट, ताकम, घतान, पिप्ले, भगवती, बेग, दोवा, दोसल्ले, घार, भुरुङ तातोपानी, दाना र नारच्याङमा दुई सयभन्दा बढी सुन्तला बगैँचा छन्।

जिल्ला सदरमुकाम बेनीका साथै राजधानी काठमाडौं, पोखरा, मुग्लिनगायत बजारमा सुन्तला बिक्री भएको मंगला गाउँपालिका-३ भोर्लेनीका किसान ओम गिरीले बताए। गिरीले आफ्नो बगैँचाबाट यस वर्ष ११ लाख रुपैयाँबराबरको सुन्तला बिक्री भएको बताए।

यातायात सुविधा भएकाले व्यापारी सुन्तला खरिद गर्न गाडी लिएर बगैँचामै आउने गरेका छन्। प्रधानमन्त्री कृषि आधुनिकीकरण परियोजना, कृषि विकास कार्यालय र स्थानीय तहको कृषि शाखाले सुन्तलाका बिरुवा वितरण, प्राविधिक तालिम, बगैँचा व्यवस्थापन, साना सिँचाइ र बजारीकरणमा सहयोग गर्दै आएका छन्। रासस